பொலித்தீன் பாவனைக்கான மாற்றுத்திட்டம்.

ஏ.எம். றியாஸ் அகமட்,

சிரேஸ்ட விரிவுரையாளர், கிழக்கு பல்கலைக்கழகம்.

பொலித்தீன் பாவனையை அரசாங்கம் தடைசெய்யத் தீர்மானம் எடுத்தது சிறந்த ஒரு முடிவாக இருந்தாலும் மக்களுக்கு பொலித்தீன், பிளாஸ்ரிக் பாவனைகளால் ஏற்படும் தீங்குகள்பற்றியும், அவற்றுக்கான மாற்றுக்கள் பற்றியும் இன்னும் போதிய தௌவின்மையும், விழிப்பூட்டலின்மையும் அந்த திட்டத்தை நடைமுறைப்படுத்துவதில் பாரிய சவாலாகவே காணப்படும். மக்களைக் கவராத திட்டங்கள் பொதுவாக தோல்வியிலேயே முடிந்திருக்கின்றன. எனினும் மக்களின் நன்மை கருதியே இத்திட்டங்கள் முன்னெடுக்கப்படும்போது, மக்கள் அதற்கு ஒத்துழைத்தலும், ஆதரவு வழங்கலும் அவர்களின் தலையாய கடமையாகும்.

மக்களின் மனநிலையிலும் மாற்றங்கள் ஏற்பட வேண்டும். உதாரணமாக திருமண. சடங்கு வீடுகளில் கழுவுவதற்கு தாராளமாக நீரிருந்தும், ஒரு நாளைக்கு இலட்சக்கணக்கான லஞ்ச் சீற்கள் சாப்பாட்டுப் பீங்கான்களுக்கு மேல் பாவிக்கப்பட்டு வீசப்படுகின்றன. இதற்கு பிரதான காரணம் சோம்பலே. இந்த மனநிலை மாற்றப்பட வேண்டும். சூழல் மாசடைவால் ஏற்படும் ஆபத்தான விளைவுகளைக் கருத்திற்கொண்டு மத்திய சூழல் அதிகார சபையினால் உணவு பொதியிடும் லஞ்ச் சீற், பொலித்தீன் பைகள்;, உணவுபொதியிடப் பயன்படும் ரெஜிபோம் பெட்டிகள் என்பனவற்றுக்கு தடைவிதிக்கப்படவுள்ளது. நாளாந்தம் எம் நாட்டில் 400 தொடக்கம் 500 தொன் பொலித்தீன்கள் கழிவுகளாக உருவாக்கப்படுவதாகவும் நாளொன்றுக்கு உணவு பொதியிடலுக்காக மட்டும் பத்துமில்லியன் லஞ்ச் சீற்கள் பாவிக்கப்படுவதாக அரச தகவல்கள் கூறுகின்றன. லஞ்ச் சீற், பொலித்தீன் பைகள் போன்றவைகள் காவிக்கொண்டு செல்வதற்கும், பயன்படுத்திய பின் தூக்கி வீசுவதற்கும் இலகுவாகவுள்ளது. மாற்றீடுகளைப் பாவிக்கத் தொடங்கும் போது சோம்பல் காரணமாக சில சிரமங்களை எதிர்கொள்ள வேண்டி ஏற்படும். அதனை ஆரம்ப நிலையில் தாங்கிக்கொள்ள அல்லது பழக்கமாக்கிக்கொள்ள வேண்டும். எமது சோம்பல் மனப்பான்மையும் சுற்றுச்சூழல் மீதான அக்கறையின்மையும் இயற்கையின்மீதான நேயமின்மையும் இதற்கு காரணங்களாக இருக்கலாம்.

பிளாஸ்ரிக் அல்லது பொலித்தீன் பைகளை மீள்சுழற்சி செய்யும்போது 1 தொன்னிற்கு 4000 அமரிக்க டொலர்கள் செலவாகின்றன. ஆனால் அவைகள் சந்தைக்கு வரும்போது வெறும் 32 டொலர்களுக்கே விற்கப்படுகின்றன. இது நாட்டின் பொருளாதாரத்திற்கு உகந்ததல்ல. அத்துடன் உயிரிகளின் உதவியுடன் பொலித்தீன், பிளாஸ்ரிக் உக்கும்போது வெளிவிடப்படும் மெதேன் வாயு, பச்சைவீட்டு விளைவை (புவி வெப்பமடைதலை) ஊக்குவிக்கும் முக்கியமான வாயுவாகும். பாவனையைக் குறைத்து மீண்டும் பாவிக்கும்போது, பொலித்தீன், பிளாஸ்ரிக்கினால் ஏற்படும் பாதிப்பை குறைக்கலாமேயொழிய முற்றாக இல்லாமலாக்க முடியாது.

ஆனாலும் மீள்பாவனையால் சில நன்மைகள் இருப்பதையும் ஏற்றுக்கொள்ளத்தான் வேண்டும். மீள் பாவனையின் காரணமாக பொலித்தீன் உற்பத்தி குறையும். அதன் காரணமாக பெற்றோலியத்தில் தங்கி நிற்பதுவும், பெற்றோலியப் பாவனையும் குறையும். பொலித்தீன், பிளாஸ்ரிக் காரணமாக வருடாந்தம் இறக்கும் மில்லியன் கணக்கான கடல் வாழ் உயிரினங்களையும் பறவைகளையும் பாதுகாக்கலாம். மீள்பாவனையானது கடதாசி பாவனையை குறைக்கின்றது. அமெரிக்காவிற்கு வருடாந்தம் ஒரு பில்லியனிற்கு அதிகமான கடதாசி பைகள் தேவைப்படுகின்றன. இதற்காக 14 மில்லியன் மரங்கள் வெட்டப்படுகின்றன. அத்துடன் கடதாசி உற்பத்தி;க்கு அதிக நீரும் தேவை. மீள்பாவனையானது நீரையும் பாதுகாக்கின்றது.

பாஸ்கம் அன்ட் ரொயொற்றா சுசொ கூட்டுத்தாபனமானது, பொலித்தீனை கரும்பிலிருந்து பெறப்படும் உயிர்எதனோலிலிருந்து உற்பத்தி செய்கின்றது. இதன் பிறேசில் தொழிற்சாலையின் வருடாந்த உற்பத்தி 180000 தொன் கிலோகிராமாகும். மேலும் கோதுமை, பீற்றூட் போன்றவைகளிலிருந்தும் உற்பத்தி செய்யப்படுகின்றன. இதனால் பொலித்தீனின் வழமையான மூலப்பொருளான பெற்றோலியம் தவிர்க்கப்படுகின்றது. அண்மையில் நடந்த பொலித்தீன் உற்பத்தியாளர்கள், மொத்த விற்பனையாளர்களுடனான கலந்துரையாடல் ஒன்றில் ஜனாதிபதி பொலித்தீன் உற்பத்தியாளர்களுக்கு உயிர்எதனோல் மூலப்பொருள் பொலித்தீனை மூன்று வருடங்களுக்குள் பெற்றுத் தருவதாக வாக்களித்திருக்கின்றார்.

பொலித்தீன், பிளாஸ்ரிக்கினால் ஏற்படும் பிரச்சினைகளைத் தவிர்ப்பதற்காக உயிரியல்ரீதியாக உக்கக்கூடிய பிளாஸ்ரிக்வகைகள் பல்வேறு ஆய்வுகள் மூலம் உருவாக்கப்பட்டுள்ளன. 2008, மே மாதம் கனடாவைச் சேர்ந்த 16 வயதான டேனியல் பர்ட் என்பவர், சூடோமோனஸ் புளோறொசென்ஸ் என்ற பக்டீரியாiவை ஸ்பிக்கோமொனஸ் என்ற பக்டீரியாவின் உதவியுடன் கண்டுபிடித்து, மூன்று மாதத்திற்குள் 40 சதவீதமான பிளாஸ்ரிக்கை உக்கச் செய்தார். இதே போன்று பிறேவிவில்லஸ் பொஸ்ற்றொலொன்சிஸ் (707 வகை) பக்டீரியாவும், அசற்றோபக்டர் 351 பக்டீரியாவும் போன்று உக்கச் செய்கின்றன. 2014ல் சீனாவைச் சேர்ந்த ஆய்வாளர் ஒருவர், இந்திய மீல்மொத் குடம்பிப் புழுவைப் பயன்படுத்தி, பொலித்தீனை சமிபாடடையச் செய்தார். அதற்குக் காரணம் அதன் சமிபாட்டுத் தொகுதியிலுள்ள பக்டீரியாவாகும். 2017ம் ஆண்டு, கலேரியா மெலெனெல்லாவின் அணங்குப் புழு, பொலித்தீன், பிளாஸ்ரிக் குப்பைகளை உண்ணுகின்றது என்று கண்டுபிடித்தார். 2010ம் ஆண்டு ஜப்பானைச் சேர்ந்த அகினொரி இற்றோ எ;னபவர், பொலித்தீனிலிருந்து எண்ணெய் உற்பத்தி செய்யும் இயந்திரமொன்றைக் கண்டுபிடித்தார்.

பொலித்தீன், பிளாஸ்ரிக் கழிவுகளை எரிப்பது சிறந்த கழிவகற்றல் முறையல்ல. இவற்றை எரிக்கும்போது உருவாகும் நூற்றுக்கணக்கான நச்சுப் பொருட்கள் எவ்வாறு தனி மனித வாழ்விற்கும், உயிரிகளிற்கும், அதன் சூழலிற்கும், மற்றும் முழு உலகிற்கும் தீங்கானவைகளாக இருந்தன என்பதுபற்றி சென்ற கட்டுரையில் பார்த்தோம்.

எனவே பொலித்தீன், பிளாஸ்ரிக் பாவனைகளை நாளாந்த வாழ்க்கையில் குறைப்பதும், அதற்கு மாற்று வழிகளைப் பாவிப்பதும், முற்றாக பாவிக்காமல் விடுவதும் மிகவும் சவாலான ஒன்றாகும். இவற்றின் பாவனைகளை நாளாந்த வீட்டு, அலுவலக, சமூக கலாச்சார நடவடிக்கைகளில் எவ்வாறு இழிவளவாக்கி நடைமுறைப்படுத்தலாம் என்று பார்ப்போம்,

வீட்டு நடவடிக்கைகள்:

சுற்றுச்சூழலுக்குப பாதிப்பை ஏற்படுத்தாத துணியிலான, கடதாசிகளிலான பைகளைப்பாவிப்பதில் அக்கறை செலுத்தல்;, வீட்டில் நடக்கின்ற பல்வேறு வகையான நிகழ்வுகளின்போதும் பிளாஸ்ரிக் போத்தலில் அடைத்த குளிர்பானங்களையும், அதற்குரிய உறிஞ்சு குழாய்களையும் பாவிப்பதைத் தவிர்த்தல், அதே போன்று தூக்கி எறியக்கூடிய பிளாஸ்ரிக் கப், கோப்பைகள் பாவிப்பதையும் தவிர்த்தல், வீட்டில் உருவாகும் பொலித்தீன், பிளாஸ்ரிக் கழிவுகளை மீள்சுழற்சிக்கு கொடுப்பதில் முனைப்புடனும், சோம்பலின்றியும் இருத்தல்.

அலுவலக நடவடிக்கைகள்: 

உணவு எடுத்துச் செல்வதற்கு லன்ச் சீற்களை தவிர்த்து, சாப்பாட்டு பெட்டிகளை பயன்படுத்தல். அலுவலகங்களுக்கும், பொது இடங்களுக்கும் வருகின்றவர்கள் பொலித்தீன், பாவனைகளிலிருந்து தவிர்ந்திருக்குமாறு அறிவுறுத்தலும் வேண்டுதலும், அரச, தனியார் நிறுவனங்களில் நிகழும் வைபவங்களில் பொலித்தீன், பிளாஸ்ரிக் பாவனையை தவிர்தலும், தடுத்தலும், அலுவலக சிற்றுண்டிச் சாலைகளில் பிளாஸ்ரிக் கோப்பை, பிளாஸ்ரிக் தட்டுக்களில் உணவு வழங்குவதை தவிர்த்தல், தென்னை நார்களிலான தயாரிப்பிலான கால்துடைப்பான்கள், துடைப்பங்கள் போன்றவற்றை அலுவலகங்களில் பயன்படுத்தல். பொது இடங்களிலும், அலுவலகங்களிலும் இவ்வகை கழிவுகளை சேகரிக்கும் தொட்டிகளை மக்களுக்கு இலகுவில் தெரியும்வண்ணம் அமைத்தல் மற்றும் சேகரிக்கப்படும் இக் கழிவுகளை முறையாக அகற்றல்.

சமூக கலாச்சார நடவடிக்கைகள்:

மத நிகழ்வுகளில், ஆலய திருவிழாக்களில் பொலித்தீன், பிளாஸ்ரிக் மூலம் செய்யத அலங்காரங்களைத் தவிர்த்து பாரம்பரிய பொருட்களை பயன்படுத்தி அலங்காரங்களை மேற்கொள்ளல். அரசியல் நிகழ்வுகளில் ரெஜிபோம், பிளாஸ்ரிக், பொலித்தீன் போன்றவற்றினால் செய்யப்பட்ட அலங்காரவளைவுகள், அலங்காரங்கள்; மற்றும் பதாகைகளைத் தவிர்த்து அவற்றுக்குப் பதிலாக பருத்தித் துணியாலானவற்றைப் பயன்படுத்துதல். அறிவித்தல்களுக்காகவும், விளம்பரங்களுக்காகவும் பிளாஸ்ரிக் பேனர்களைத் தவிர்த்து துணியாலான பேனர்களை பயன்படுத்தல். திருமண மண்டபங்களில் பொலித்தீன், பிளாஸ்ரிக் பாவனையை  தவிர்த்தலும் தடுத்தலும். வுpழாக்களில் அதிதிகளுக்கு பொலித்தீன் மாலைகளை அணிவித்தலைத் தவிர்த்தலும், அணிதலைத் தவிர்தலும். விழாக்களின்போது உணவுப் பொதி செய்வதற்கு ரெஜிபோம் பெட்டிகளையோ லஞ்சீற்களையோ பாவிப்பதனைத் தவிர்த்தல்.

இவ்வகையான ஒழுக்கங்களை நாளாந்த வாழ்க்கையில் நாங்களும் கடைப்பிடித்து மற்றவர்களையும் அவ்வாறு ஒழுகச் செய்தலின் மூலமே பொலித்தீன், பிளாஸ்ரிக் காரணமாக உருவாகும் பிரச்சினைகளை இழிவளவாக்கலாம். இதுதான் பொலித்தீன் வரமாக அல்லது சாபமாக மாறுவதற்கான அடிப்படையுமாகும். அப்போதுதுதான் திட்டங்கள் வெற்றியும் பெறும். அத்துடன் நீண்டகால தாக்கங்களிலிருந்து எம் எதிர்கால சந்ததியை காப்பாற்றி, அவர்களுக்கு நல்ல ஆரோக்கியமான சூழலைக் கட்டியெழுப்பிக் கொடுக்கவும் முடியும்.